দ্বিতীয় খণ্ড - শ্রীমদ্রামকৃষ্ণস্তবরাজঃ
১
অথ শ্রীমদ্রামকৃষ্ণস্তবরাজঃ প্রারভ্যতে
ওঁ নমো ভগবতে রামকৃষ্ণায়
ওঁ - ওঁকারবেদ্যঃ পুরুষঃ পুরাণো
বুদ্ধেশ্চ সাক্ষী নিখিলস্য জন্তোঃ।
যো বেত্তি সর্বং ন চ যস্য বেত্তা
পরাত্মরূপো ভুবি রামকৃষ্ণঃ॥ ১॥
ন - ন বেদগম্যো ন চ যোগগম্যো
ধ্যানৈর্ন জাপৈর্ন তপোভিরুগ্রৈঃ।
জ্ঞেয়ঃ কদাপীহ ততোঽবতীর্ণো
দয়ানিধে ত্বং ভুবি রামকৃষ্ণঃ॥ ২॥
মো - মোক্ষস্বরূপং তব ধাম নিত্যং
যথা তদাপ্নোতি বিশুদ্ধ-চিত্তঃ।
তথোপদেষ্টাঽখিল-তত্ত্ববেত্তা
ত্বং বিশ্বধাতা ভুবি রামকৃষ্ণঃ॥ ৩॥
ভ - ভক্তেস্তথা শুদ্ধজ্ঞানস্য মার্গৌ
প্রদর্শিতৌ দ্বৌ ভবমুক্তিহেতূ।
তয়োর্গতানাং ধ্রুবনায়কোঽসি
ত্বং মোক্ষসেতুর্ভুবি রামকৃষ্ণঃ॥ ৪॥
গ - গতিস্ত্বমেকা জগতাং জড়ানাং
পুরা বিসৃষ্টেশ্চিদখণ্ডরূপঃ।
তদ্বল্লয়ে স্যা অধুনাসি তদ্বৎ
ত্বমাদিদেবো ভুবি রামকৃষ্ণঃ॥ ৫॥
ব - বর্ণাশ্রমাচার-বিহীনশান্তাঃ
সন্ন্যাসিনো জ্ঞান-বিধূতচিত্তাঃ।
ধ্যায়ন্তি যং নিত্যমভেদ-দৃষ্ট্যা
স এব হি ত্বং ভুবি রামকৃষ্ণঃ॥ ৬॥
তে - তেজোময়ং দর্শয়সি স্বরূপং
কোষান্তরস্থং পরমার্থতত্ত্বং।
সংস্পর্শমাত্রেণ নৃণাং সমাধিং
বিধায় সদ্যো ভুবি রামকৃষ্ণঃ॥ ৭॥
রা - রাগাদিশূন্যাং তব সৌম্যমূর্তিং
দৃষ্ট্বা পুনশ্চাত্র ন জন্মভাজঃ।
স্থানে যদাদায় বিশুদ্ধসত্ত্বং
ইহাবতীর্ণো ভুবি রামকৃষ্ণঃ॥ ৮॥
ম - মহদ্বিচিত্রং মহদাদিকার্যং
লব্ধ্বাঽপ্যধিষ্ঠানমনাদ্যনন্তং।
করোতি নিত্যা প্রকৃতিস্তবাদ্যা
তদ্ব্রহ্ম সচ্চিদ্ ভুবি রামকৃষ্ণঃ॥ ৯॥
কৃ - কৃশানুবৎ-তাপ-বিদগ্ধচিত্তাঃ
সংসারিণঃ শান্তিনিকেতনং ত্বাং।
সংপ্রাপ্য শান্তা হি ভবন্তি তেষাং
ত্বং শান্তিদাতা ভুবি রামকৃষ্ণঃ॥ ১০॥
ষ্ - ষড়ঙ্গযোগো ন যতঃ সুসাধ্যো
জ্ঞানাধিকারী সুলভো ন যস্মাৎ।
গরীয়সী ভক্তিরতঃ কলৌ স্যাৎ
তজ্জ্ঞাপকস্ত্বং ভুবি রামকৃষ্ণঃ॥ ১১॥
না - নাকাদিলোকং সুখদঞ্চ দিব্যং
সুরম্যমৈশ্বর্যমহং ন যাচে।
হৃদাসনে ত্বং কৃপয়া সদা বৈ
বসেতি যাচে ভুবি রামকৃষ্ণঃ॥ ১২॥
য - যং ব্রহ্ম-বিষ্ণু-গিরিশশ্চ দেবাঃ
ধ্যায়ন্তি গায়ন্তি নমন্তি নিত্যং।
তৈঃ প্রার্থিতস্তস্য পরাবতারো
দ্বিবাহুধারী ভুবি রামকৃষ্ণঃ॥ ১৩॥
বন্দে জগদ্বীজমখণ্ডমেকং
বন্দে সুরৈঃ সেবিত-পাদপীঠং।
বন্দে ভবেশং ভবরোগবৈদ্যং
তমেব বন্দে ভুবি রামকৃষ্ণঃ॥ ১৪॥
রামকৃষ্ণং চিদানন্দং যঃ স্তৌতি ভক্তিমান্ সদা।
তস্য চিত্তং ভবেচ্ছুদ্ধং তত্ত্বজ্ঞানং স্বয়ং ততঃ॥
শ্রীমদভেদানন্দস্বামিনা বিরচিতম্।